قۇدۇق يەر ئاستىدىن سۇ، نېفىت، تەبىئىي گاز قاتارلىق بايلىقلارغا ئېرىشىشتە ئىشلىتىلىدىغان تىك ياكى يانتۇ كولاپ ئېچىلغان ئېغىز.
ئۇيغۇرچە / Uyghurche : قۇدۇق
ئىنگىلىزچە / English : Well
تۈركچە / Türkçe : Kuyu
خەنزۇچە / 汉语 : 井
ئىنسانلار قەدىمدىن تارتىپ قۇدۇق قېزىش ئارقىلىق يەر ئاستى سۈيىگە ئېرىشىپ، تۇرمۇش ۋە دېھقانچىلىق ئېھتىياجىنى قاندۇرۇپ كەلگەن. قۇدۇقنىڭ قۇرۇلمىسى ۋە ئىقتىدارى ئىشلىتىلىش ئورنى ۋە تېخنىكىسىغا ئاساسەن ئوخشاش بولمايدۇ.
ئوخشىمىغان مەدىنىيەت ، ئوخشىمىغان رايونلاردىكى قۇدۇق قېزىش ۋە قۇدۇق ئېغىزىنى لايىھىلەش تېخنىكىسىدە ئاز تولا ئوخشىماسلىق بولىدۇ.
قۇدۇقنىڭ تۈرلىرى:
1. سۇ قۇدۇقى : ئەڭ كۆپ ئۇچرايدىغان قۇدۇق تىپى بولۇپ، يەر يۈزىدىن يۇمىلاق شەكىلدە يەر ئاستى 10-15 مىتىر ھەتتا تېخىمۇ چوڭقۇرلۇقتا كولاپ ، يەر ئاستى سۈيىگە ئېرىشىشكە ئىشلىتىلىدۇ. قول بىلەن ياكى ماشىنا بىلەن قېزىش ئارقىلىق يەر ئاستىدىكى سۇ قاتلىمىنى تېشىپ ئۆتۈپ، سۇنى قۇدۇقتىن تارتىپ چىقىرىپ، ئىنسانلار ياكى ھايۋانات ۋە ئۆسۈملۈكلەرنىڭ ئىشلىتىشىگە بېرىدۇ.
2. نېفىت قۇدۇقى ۋە تەبىئىي گاز قۇدۇقى : يەر ئاستىدىكى نېفىتلىك ياكى گازلىقتىن نېفىت ۋە تەبىئىي گاز ئېلىشقا ئىشلىتىلىدۇ. بۇ خىل قۇدۇقنى ئىنتايىن چوڭقۇر كولاشقا توغرا كېلىدۇ. ئادەتتە مۇرەككەپ بۇرغىلاش ئۈسكۈنىسى ئارقىلىق نەچچە مىڭ مېتىر چوڭقۇرلۇققىچە كولاشقا ئېھتىياجلىق.
3. يەر ئىسسىقلىقى قۇدۇقى : يەر ئىسسىقلىقى ئېنېرگىيەسىگە ئېرىشىشكە ئىشلىتىلىدۇ، قۇدۇق ئارقىلىق يەر ئاستىدىكى ئىسسىق سۇ ياكى پارنى قوبۇل قىلىپ توك چىقىرىدۇ ياكى ئىسسىقلىق بىلەن تەمىنلەيدۇ.
قۇدۇقنىڭ ئاساسىي قۇرۇلمىسى:
قۇدۇق ئاغزى : قۇدۇقنىڭ ئېغىزى سۇ ياكى باشقا بايلىقلارنى ئېلىش نۇقتىسى.
قۇدۇق كانىيى : قۇدۇقنىڭ ئاساسىي قىسمى تۆۋەنگە قاراپ يەر ئاستىدىكى سۇ قاتلىمى ياكى بايلىق قاتلىمىغىچە سوزۇلىدۇ.
پومپا ياكى چىغرىق سىستېمىسى : سۇ ياكى بايلىقنى قۇدۇقتىن يەر يۈزىگە چىقىرىشقا ئىشلىتىلىدۇ.
قۇدۇق ئوخشاش بولمىغان ساھەلەردە مۇھىم رول ئوينايدۇ، ئۇ يېزا ئىگىلىكى، سانائەت ۋە ئائىلىلەرنى سۇ بايلىقى بىلەن تەمىنلەپلا قالماستىن، يەنە ئېنېرگىيە ئېلىش ۋە پايدىلىنىشقا ئىشلىتىلىدۇ.
